قصيدة فتاة غلطانه برقم التلفون ؟؟؟

[DoDa AlBtOoOtA]

البشـر فـي الاتصـالات يخـطـون
يخطون واخطي.. عذرنا هاتف فلان؟؟
ومن عادتي ماهتـمّ باللـي يقولـون
من غلط في رقمي .لقى الردّ غلطـان
الين جااء فـي يـوم ..دق ّ التلفـون
شفت الرقم.. لقيتـه اشكـال والـوان
فتحت جوّالـي ابعـرف مـن يكـون
سمعـت صـوتٍ فيـه بحّـه وفتّـان

قالت لي: انت سعود؟ قلت: ايه بالعون.
لعيونك.. اسمي سعود لو كان ضيدان
قالت :اتظنّي مخطئه. قلت :وشلـون؟؟
قلبي توقّـف مانبـض فيـه شريـان
بالهـون يابنـت الاجاويـد بالهـون
من عـادة الانسـان يرتـاح لانسـان
تسمّعـي يابنـت وابليـس ملـعـون
اخذي كلام ٍ مصـدره صـدق وجـدان

ماني بقايل لك: انـا انسـان مزيـون
اطرق ولاله شبه في الانـس والجـان
انا محمّد.. وافـي الهـرج مـوزون
اوزن كلامي.. قبـل اقولـه بميـزان
وانا الّـذي لاحـبّ ..لايمكـن يخـون
مخلص مدامه حيّ .ويمـوت ماخـان
وانـا اذا حبّيـت.. حبّيـت بجنـون
حبّـي يفجـر داخلـي الـف بركـان
وانا الّذي ماطـرد ورى مـن يقفّـون
من صدّ عنّي عمد.. بجزيـه حقـران
هذي وصوفي .واكثرالنّاس يشـرون
وانتي عليك اليـوم تقديـر الاثمـان

قالت :اشوفك قمـت يامحمـد تمـون
تضحـك وضحكتهـا تقاسيـم فنّـان
قلت :الميانه.. ماهي بضحكة سنـون
احيـان ماتلقينهـاا بيـن الاخــوان
ترى الميانه شيّ واضـح ومضمـون
اذا اجتمع شخصين.. في قلب ولسـان

قالت :كلامك وافـي ٍ يابـن خلـدون
احيان احسّ ان جلستك بيـن شيبـان
يامحمد .اسمع كلمة البنـت ميسـون
اسلوبك ووقتك.. مضت دونها ازمـان
هـذا زمـن قدواتـه افـلام كرتـون
وهذا زمان ارجالـه اجسـاد وابـدان
قالت.. وغنّت لي على وقتـي لحـون
قلت: اسكتي من بعد ماخاطري شـان
انا ادري ان الوقت.. من دون في دون
لكن فمـان الله وانـس ِ اللـذي كـان

قلته وانا صامل.. وهي عندهـا آذون
لكنّـهـا ماصـدّقـت سـمـع الاذاان
ضاقت ...وخلق الله دايـم يضيقـون
وانا قفلـت الخطّ..ضايـق وزعـلان
ونسيت.. والاجواد في الوقت ينسـون
ماسـمّـي الانـسـان الاّ بنسـيـان

المشكله..بنـات حــوّا مايسـلـون
دقّت علي وانـا لهـا شبـه شفقـان
قبل آآتكلّم.. قالت: اسمـع ولاتهـون
اسمي مهو ميسون.. حان الصدق حان
الاسم عمشاء وآخـر الجـدّ مصيـون
مهـره ولا طوّعـت بلجـام وعنـان
قلت: ارحبي مليون تضـرب بمليـون
اقولهـا مليـون مـن قلـب ولسـان
قلت: ارحبي في العين ..ولحافك جفون
وظلالك من الشمس باهـداب الاعيـان
ياعيـن حـر ٍ بالمطاليـع مفـتـون
حر ٍ شـراه مولّـع الصيـد طربـان


منقولة للأمانة