الذهبية - إن عشت يا راسي كسيتك عمامة

إن عشت يا راسي كسيتك عمامه
وان مت يا راسي فدتك العمايم

يا راس شيبك ما بدا بك مذله
والشيب تكرم به كبار اللمايم

الاجواد يكرم شيبها في مشيبها
نقالة القالة محوص الصرايم

ياما نطحنا في الصبا من قبيلة
يوم الصبا والرمح للكيف رايم

و ياما خذينا تونا من كسابه
بسيوفنا راحت تقسم غنايم

و ياما نسفناهم على جال وادي
و ياما نحونا فوق سود الشكايم

اربع مية خيال جونا مسيره
جونا يبون الغرس حلو الطعايم

وقالوا يسار الغرس والا يمينه
امس لكم واليوم جا فيه سايم

وقلنا لهم من دونه الموت حامي
اليوم نهدي الروح نخشى اللوايم

وثنيتها لعيون غرس بكاير
يثمر بهيبتنا غصونه نعايم

واخذت اطاردهم وانا فوق قبا
مثل الهدود اللي عن العشب صايم

تلحق ليا غارت ولا يلّحق بها
شقرا ولا ضريتها بالهزايم

من يوم بان الفجر لين اعتلى الضحى
وحنا نقلط للمسير عزايم

والله عطانا منصب الحق والظفر
يوم التقت بين القروم الولايم

يوم اسلموا للمنع واسندت عنهم
لياهم كما عشب لفح به سمايم

هذاك اسير وذاك يومه دنابه
وهذاك مكسور وهذاك شايم

هذا زمان فات ما ينفع المنا
يوم اذكر الماضي تزيد العظايم

الراس شاب وثالثة رجلي العصا
والله يوقظ قلب من كان نايم

لعل قبل الموت نسمع بشيره
ابجاه من يحيي العظام الرمايم

وصلاة ربي عد ما ذعذع الهوا
على النبي واصحابه اهل الكرايم

قصيدة للشيخ الشاعر / محمد بن سرار المنبهي الشهراني رحمة الله عليه

وهو شيخ واحد فرسان قبيلة بني منبه شهران ......