[فوفو]

اكبر درس

هوا صراحة الحمد لله ربنا ستر

كنت انا فسيارتي وصاحبي فسيارتو


وبنتسابق انا ماشي 180 وهوا كان 200 و حاجة وورايا

جات سيارة خرجت قدامي

اتجاوزتها

بس للأسف

صاحبي

رفيق العمر

ما لحق يستوعب

اتجاوزو بسرعة

وانحرفت السيارة وراحت الخط التاني وهيا تنقلب

انا الموقف دا كلو شفتو من المرايا الجانبية فسيارتي

شفت الموقف وهوا يتجاوز السيارة ويروح الرصيف وينقلب

انا فدا الوقت

قلبي بدأ يخفق بسرعة عمري ما حسيتها

و قعدت اذكر الله ومني قادر ابكي من الصدمة

اخدت الدوار و رجعت ادور عليه

لقيت السيارة مو باقي منها شي

على طول ضغطت الفرامل باقوى ما عندي والمرور وصل وقتها

ما فكرت فيه مع انو من شدة وقوفي طلع صوت تفحيط

جريت على السيارة ما لقيت صاحبي

وقتها حسيت نفسي الارض تنشق وتبلعني

الولد طار ولا ايش صار فيه ولا ولا ولا

شوية لقيتو واقف بعيد عن السيارة مصاب بشوية جروح

من الفرح

جريت وحضنتو وانا عمري ما حضنت احد من اصحابي وقتها

قعدت حاضنو دقيقتين يمكن وانا اطمن عليه واقول الحمد لله

الحمد لله

طبعا دا الموقف قعد يومين ما خلاني انام

واتذكر المنظر اللي شفتو فمراية سيارتي

كأنو فلم في التلفزيون

بعدها بطلت اتهور والحمد لله

دي من اقوى المواقف اللي حصلت في حياتي واثرت عليا