كمشة حكي :
نحن الأردنيون
إذا صار عنَا عُرس بنزمر.
و إذا نجحلنا حدا بالتوجيهي بنزمر.
قبل ما تفتح الإشارة الضوئية (بثانية) بنزمر.
و بعد ما تفتح الإشارة كمان بنزمر.
وعلى الدوّار... وعلى الكوربه علنزله و علطلعة كله بزمر.
إذا طوّل علينا الشرطي وهو موقفنا على الدوّار مشان نذكره.. بنزمر.
أما إذا حدا كسر علينا!!! - بالغلط أو بالقصد - فأكيد بنزمر.
ولو حدا ثاني قدامنا ماشي بطيء - بكزدر - كمان بنزمر.
أما اللي بتوقف سيارته قدامنا (عطلانه) فمش مشكلتنا بنزمر.
إذا طالعين من شارع فرعي لرئيسي - بالليل أو بالنهار - بنزمر.
سَواق باص المدرسة إذا تأخر أحد التلاميذ الصبح بكييييير بزمر.
و فلان إذا جاي ياخد صاحبه بدل ما ينزل يناديه..... بزمر.
إذا عجبتنا بنت بالشارع بنزمر.
وإذا شفنا أبو فلان بالشارع و حبينا نقول مرحبا....بنزمر.
لو قرر واحد منّا يخفف ليمرر أحد المشاة!!!! كل اللي وراه بزمر.
وإذا فاز حد معجبين فيه أو فيها بسوبر ستار أو ستار أكاديمي ف بنطلع نزمر.
وطبعا إذا فاز المنتخب بنزمر.
لا أظن أنها ظاهرة أليس كذلك؟؟؟!!!! و لكن المفارقة هو أنه إذا ارتفعت الأسعار (الوقود مثلاً) و اذا ارتفعت الضرائب...إذا إنخطفوا الشباب في العراق!!! و إذا زادت رواتب الكبار وبقيت على حالها رواتب الصغار...إذا زاد معدل البطالة مع وفود الكثير من العمالة.... إذا حصل كل هذا و أكثر....
العجيييييييب يا إخوان إنه فجأة ( ما بطلعلنا صوت )
