[بنت المدينة]

بسم الله الرحمن الرحيم

اليوم حابة اقلك على طريقة عمل الكابتشينو في البيت يعني لا جوكي صاحباتك ولا ضيوف وحبيتي تغيري نوع التقديم الروتيني (( بارد بعدين قهوة بعدين شاي)) اعمليلهم مشروبات اكيد ماهي جديدة بس لزيزة...

لا اطول عليكم

انا حكتبلكم مقدار لكباية وحده

كاسه الجبنه الصغيره مثلا

2 ملعقة سكر
1 ملعقة نسكافة
1ملعقة مويه

اخفقي المقادير دي كلها سوي بملعقه لين تصير زي الرغوة ويصير لونها فاتح
وبعدين صبي عليها حليب فاير
وتصير عندك كاسة نساكافة لزيزة برغوة كثيفة

للنكهات :

هادي طريقة الكابتشينو سادة وازا حبيتي تضيفي نكهات تقدري تتفنني على مزاجك

مثلا ....
بعد ما تخفقي النسكافه والسكر تقدري تضيفي عليها نكهة الكراميل من فين نجيب صوص الكراميل؟
سيحي مكعبات التوفي مع فنجان حليب على حمام بخار وبعد مايسيج التوفي يصير عندك صوص التوفي ضيفي ملعقة منو عالكابتشينو الي سويناه ويطلع عندك احلى ميكاتو في العالم .
وبعد ماتصبي الحليب الحار حتطلعلك رغوة كثيفة ممكن نبشر فوقها جالكسي او نرش عليها بودرة الجالكسي .

نكهات تانيه :

ممكن نضيف ملعقة شوكولاته بودرة بعد خفق النسكافة

او ممكن تضيفي ملعقة قهوة تركي بعد خفق النسكافة (( حتطلعلك نكهة القهوة فرنسي ))

وممكن تضيفي نكهة التفاح (( قشري التفاحه وججفي قشرها واطحنيها = بودرة التفاح الي ممكن نضيفها مع الشاي كمان ))

ونفس الشي مع البرتقال او نكهة الليمون ..

او ملعقة شوكولاته نوتيلا..

وازا تحبي تضيفي ملعقة دريم ويب صغيرة مع الحليب برضو نكهة ..

وممكن يكون الحليب الي نضيفو للنسكافة يكون حليب مع موز اوفراولة...

ملاحظة : ممكن تعملي كمية كبيرة من النسكافة المخفقوة بآلة الخفق اسرع وأسهل وتحطيها في التلاجه وتخليها لمن تحبي تستخدميها تكون جاهزة لاشخاص كتير .

وانت برضو تقدري تبتكري نكهات حلوة وتتفنني على مزاجك ولا تخليه سرك لوحدك ورينا ايش ابتكرتي

والموضوع لاهو منقول ولا منسوخ ابتكار برضو