مثلث الرعب تحت ستار العلم

[فلاوي]

بسم الله الرحمن الرحيم


افلام كتير اتفرجناها وقصص كتير قريناها وحكاوي كتير سمعناها عن مثلث برمودا

هيا منطقة في المحيط الاطلسي على شكل مثلث

هيا منطقة اختفت فيها سفن كتير وطيارات كتير

هيا منطقة محد عرفلها حل للان

هيا منطقة قالو عنها انها فيها احداث غامضة

منطقة اتكلم عنها العلم بانو مالها تفسير

منطقة اتكلم عنها العالم العربي بانو عرش ابليس هناك ( مرررة ما دخلت مزاجي )


طبعا التفاسير كتيرة والقصص كتيرة وما ابغا اطول فيها

انا حاجبلكم تفسير لدي الظاهرة من وجهة نظري الشخصية وياريت تناقشوني انتو بافكاركم







زي ما انتو شايفين انو المثلث بالاحمر يبدأ راسو الشمالي الشرقي بجزيرة برمودا واللي جا منها التسمية وراسو الغربي في ميامي والجنوبي في بورتريكو




هوا بس عشان يكون في العلم مثلث برمودا مهو المنطقة الوحيدة اللي فيها حوادث الاختفاءات هادي

وفي منها بحر الشيطان في اليابان برضو ومنطقة تانية عند كامشاتكا في روسيا


وعلى فكرة اول المشاهدات للاحداث الغرييبة في برمودا كتب عنها كريستوفر كولمبوس لما اتكلم عن تهيج في المحيط وتغير لون السما وانو شاف كورة نارية ضخمة طاحت في وسط الموية وممكن تلاقوها في كتابات كولمبوس نفسو
وملحوظة بالنسبة لقصة السرب 19 اللي تعتبر اشهر قصة اختفاء في سماء المثلث او زي ما يقولو اشهر حادثة اختفاء طيارات


عام 1945م انطلقت من قاعدة لوديرديل بولاية فلوريدا الأمريكية خمسة طيارات في مهمة تدريبية في رحلة تبدأ من فلوريدا ( المسافة 160ميل شرق القاعدة ثم 40 ميل شمال وكانت تطير على شكل مثلث ) .

عدد أفراد دا السرب خمسة طيارين وتمانية مساعدين على قدر عالي من المهارة والخبرة وكان قائد دا السرب الملازم " تشارلز تايلور " الي يمثل راس المثلث وفي اثناء اداء المهمة كان السرب يتجه في لحظة ما ناحية حطام سفينة شحن بضائع يطفو على سطـح المحيـط جنـوب بيميـني (Bimini) واثنـاء انتظار القاعدة الجوية لرسالة من ( السرب 19 ) لتحديد ميناء الوصول وتعليمات الهبوط تلقت القاعدة رسالة غريبة من قائد السرب تقول : القائد ( الملازم تشارلز تايلور ) ينادي القاعدة نحن في حالة طوارئ يبدو أننا خارج خط السير تماماً " لا استطيع رؤية الأرض ، لا استطيع تحديد المكان " اعتقد أننا فقدنا في الفضاء ، كل شيء غريب ومشوش تماماً لا استطيع تحديد أي اتجاه حتى المحيط أمامنا يبدو في وضع غريب لا استطيع تحديده "
وانقطعت بعد ذلك سبل الاتصال بين القاعدة والسرب 19




اخر جملة قالها تشارلز تايلور واللي ولعت الدنيا كولها على برمودا

انو مهما فعلتم لا تلحقو بنا

وكان في طيارة قريبة التقطت اشارات بين افراد السرب نفسو عن تعطل البوصلة وعن انو الارض اختلفت عليهم والوقود قرب يخلص


وكان في حملات بعد كدا اتنين منها فقدت والبقية ما وصلت لشي

واكتر شي غريب كان انو السفن اللي تختفي بيلاقوها بعد فترة بكل المؤونة والفلوس اللي عليها لكن لا اثر لاي حياة

واحيانن موت بشكل غريب زي ما سار في السفينة البرتغالية سانتا ماريا

وبالنسبة للطيارات حقت السرب 19 لاقتها شركة امريكية عام 1991

على بعد 15 كيلو متر من جنوب فلوريدا وعلى عمق 230 متر بس


عالعموم كتير تفاسير جات


احسها انو اكترها اقناع هوا ظاهرة الكويكب اللي طاح عالارض في منطقة خندق بورتريكو اللي يشكل راس من رؤوس المثلث والكويكب دا لما اتحرق وهوا في الغلاف الجوي

بقي منو اجزاء فيها شحنة مغناطيسية مررررة قوية

ودي بتسبب الموجات الاستاتيكية تتسبب بعطل البوصلات والاجهزة اللاسلكية اللي يمكن تفسر سقوط الطيارات واللي بكل بساطة ضياع الطائرة من غير جهاز لاسلكي او بوصلة مما يخليها تدور في حلقات مفرغة وينفد الوقود عليها والدليل على كلامي دا انو كول الطائرات المفقودة تقريبن وجدت في اماكن متفرقة وقريبة من السواحل فدا معناتو انو السرب 19 تاه واختلطت عليه شكل المنطقة وفضل يدور على نفسو الين خلص وقود الطيارة وطاح السرب كولو ودليلي على انو بيدور حولين نفسو انو لاقو الطيارات غرقانة على عمق بسيط وقريب من الشط عند احد رؤوس المثلث

وبالنسبة للسفن انهم لاقو بعضها دا دليل على نفس الاعطال اللي تسبب الضياع

وبالنسبة لغرق السفن معروف عن المنطقة انها منقطة براكين تحت الماء ولما بيحصل انفجار بركاني او حالة نشاط بركاني اكيد بيكون معاها زلزال بيحرك الطبقات الارضية اللي تحت الموية اللي احيانن تحدث تشقق ينتج عنو خروج الهوا اللي محتجز في باطن الارض للموية على شكل فقاعاات مرررة ضخمة طبعن لخفتها تطلع الفقاعات هادي للسطح ولما تنفجر تخلف مكانها فراغ هوائي ما يستمر لثواني ووتصدف في اوقات كتيرة انو سفينة بتكون موجودة في مكان الفراغ الهوائي دا فتطيح فيه وتغطيها الموية وتغرق السفينة

وطبعن في حالات كتيرة طيارات وسفن تعدي من المنطقة بدون ما يسير اي شي فعشان كدا نظرية الموجات المغناطيسية بالنسبة للطيارات وتعطل البوصلة للسفن والضياع تعتبر منطقية جدا

وبالنسبة لغرق السفن فنظرية الفقاعات الهوائية الناتجة عن تحرك القشرة الارضية برضو جدا منطقية

اسف عالاطالة وياريت نتناقش في دا الموضوع بشكل علمي ونبعد عن حكاية المسيح الدجال هناك وعرش ابليس هناك اللي سرت اسمعها مررة كتير

مشكورين

[WashintonDC]

مثلث عجيب فعلا وسمعنا كتير عنه
والله يا فلاوي الي سمعته انه تكثر الاعاصير والدوامات في هذه المنطقة لطبيعتها الجغرافية

[admin]

هلا بيك يا اخ فلاوي

معلومات رائعة و مفيدة عن هذا المثلث العجيب

انا من ناحيتي متأكد ان اغلب الحوادث الى حصلت بسسب ظواهر طبيعية والله اعلم

[sami haroon]

وانا اعتقد كمان زي ماقال الاخ جلمود ظواهر طبيعية مش اكثر

[جداوي]

انا شفت برنامج الاسبوع الى راح عن مثلث الرعب

وتم اثبات الان جميع حوادث الاختفاء سببها حوادث طبيعية زي ما قلت يا فلاوي

لان داخل المثلث تكون صواعق تسبب موجات كهربائية تؤثر على اجهزة الملاحه

فتخلي الطيراين يضيعوا الطريق

[$ M.E.D.O $]

والله اعتقد انو زي ما قال فلاوي كويكب لانو منطقي



كتر منها