العودة   الذهبية > منتديات الذهبية المنوعة > ركن المرح والترفيه والالعاب > طرائف والألغاز والفرفشة

« آخـــر الــمــواضــيــع »
         :: متوسط العمر المتوقع لمرضى سرطان القولون والمستقيم (آخر رد :اميرة ابى)       :: طريقة صنع البان كيك (آخر رد :om abeer)       :: طريقة المعمول بالتمر الرائع (آخر رد :om abeer)       :: طريقة الفوتشيني (آخر رد :om abeer)       :: إيدي هاو يضع علامة برونو غيماريش وهو يتطلع إلى المرحلة التالية من مشروع نيوكاسل يوناي (آخر رد :هدي فاروق)       :: العلاج فى المانيا للعرب (آخر رد :اميرة ابى)       :: طريقة تحضير السبانخ في المنزل (آخر رد :om abeer)       :: تعريف القانون الدستوري (آخر رد :merehan)       :: كيفية التخلص من غزو النمل بسرعة (آخر رد :سمي)       :: نصائح لمكافحة الحشرات بق الفراش (آخر رد :سمي)      

إضافة رد
 
أدوات الموضوع انواع عرض الموضوع
  #1  
قديم 29-03-2007, 03:37 AM
بنت المدينة بنت المدينة غير متواجد حالياً
مشرفة عامة
 
تاريخ التسجيل: Feb 2007
الدولة: المدينة المنورة
المشاركات: 11,062
Talking الزير سالم


واحد حجازي يحكّي لاولاده قصة (الزيرسالم ) اقروا القصة واضحكوا
يااولادي دحين بقلّكم لمن ألتقى الواد جساس بالحونشي داك الي شايف
نفسوا مرة اللي اسمو كليب..

خدوا الرواية : كليب كان ماشي في برحة مرة
كبيرة ومافي ناس ولا في احد جنبوا .. والواد جساس بصراحة خلبوص شويه
وجبان ..لأنو استغل وجود الحونشي كليب لوحدو..

المهم عمنا كليب ماشي
بامان الله وقاعد يشم شوية هوا وبعيد عن رجة البزورةوالبيت ومشاكل عيال
عمو وقلق الناس الي عندو... المهم جا الواد جساس وقلّو: انت يا كليب ..
طبعا كليب ادالو اشكل مارد عليه ولا ادالو وجه ..

قال جساس: انت يا
كليب رد اشبك انا قاعد اهرجك ياهووه .. وداك مديه اشكل وربي ولا هو
معبرو .. جساس: شوف ياكليب..انتا كسرت الماصورة حقتنا ولا خليتنا نشرب
مويه ، لا نحنا ولا غنماتنا ولاجملاتنا ... وكل هادا ونحنا ساكتين
وقلنا عيب مو مشكلة دا برضو ولد عمنا ومن لحمنا ودمنا... وكبير العيلة
، لكن انك تفرد عدلاتك( عضلاتك )علي الجمل حقت خالتي
البسوسة وتقتلها كمان؟

لا حبيبي دا مو كلام رجاجيل .. وألّي انتا
سويتو غلط في غلط مو عشان سكتنالك تحسبنا خايفين منك..نحنا احترمنا صلة
القرابة الي بيننا وقلنا هذا( بو رحم ) ومننا و فينا بس انتا بالمرة خبصت
أم الشغلة .. ومع كل دا الكلام والحونشي عمنا كليب مديلو اشكل بقوة ،
ولا كأنو في احد بالمرة .. جساس صرخ بصوت عالي مرة انت يا
كلـــــــــــــــيب ياخي رد عليّا ايشبك ،اتبكمت والا ايش؟

انا عارف
انو ما تطالع وراك الا ازا كان فيه بشكة اقل شي اربعين راجل... كليب
طبعا رد وهو لاوي بوزو ، ويعني اٍنو قوي مرة..

وقال: لا يا بويا غلطان
،أنا ما ارد إلا لمن تكون البشكة 50 راجل. ساعتها الواد جساس جسمو
تكهرب شويه بس سوى فيها انو ولا همو .. وداك عمنا طنش وكمّل مشيو مع
الحصان حقو المهم الواد جساس طرطع وقفلت معاه وركبو 100 عفريت.. وفي
لحظة غضب الواد جساس طلّع الرمح حقو..ورماه على عمنا كليب وغرزو في
ظهرو .. قام يتألم ويتبكبك الحونشي كليب وقعد يصرخ بصوت عالي كأنو
بعبع(وحش ) ... الواد جساس قال : ياواد ما يبغالها الا
افركلها واشرد لا يجي احد دحين والا يجي الزير ويسويلنا قلق محنا فاضيلو
دحينا،

وهاتك يا فكيك دق سلف بالحصان حقو ونمر لها..
اما عمنا كليب
حالتو صارت حاله ، قام يزحف علي بطنو شوية لمن وقف علي رجولو ويمشي
والرمح معلق بظهرو ، لمن التقى بواحد بدوي حق غنمات ... لمن شافو
البدوي انفجع وقلّو: مو انتا عمّنا كليب ،اشبك كدا؟

... ايش صار فيك
ياعمنا .. رد عمنا كليب على البدوي وقلّو: روقنا ياخي ، مو وقتو ، ما
تشوفني مغرق بالدم وانتا لسه تسال؟

.. .ياخي جيب لي شوية مويه ابغى
اشرب ياواد ... البدوي صاحبنا جبلو مويه وشرّبو . كليب: اسمع ياواد انا
غدر بي الواد جساس واكلني الرمح حقو بظهري من ورى ... والي خلق امك لو
انو كان من قدامي كان عرفت اتصرف معاه ... لكن هو رمه وجبان وخيخة
وجايني من ورى لكن مو مشكلة انا اعرف اجيب حقي ... حتي وانا ميت ورايا
رجاجيل ما تترك حقي يابويا . وقال كليب للبدوي: حكتب لك وصية تخليها
حلقه بودنك وحكتبها علي الجدار دا بدمي

لانو ماكان معاه قلم ولاورقة ولا حاجة يمكن نسيها في البيت
ولازم اخويسالم الداشر يقراها ... وبعدين الله يخليك تسوي معايا معروف انك تقتلني
بعد ما اغلق من القصيدة .. قبل ما يعفن ظهري وتصيبني الغرغرينة

سلام وقول من رب رحيم
قلّو البدوي : طيب. وبدا ابو الشباب يكتب الوصية وهي كالاتي:
اول بيت يقول
استغفر الله اله العرش لا يعبد سواه ...
وتاني بيت يقول : الملك لله رفع السماء وبسط الارض ...

وتالت بيت يقول
لاتنسى اليتاما وتخون العهد يادب ...

ورابع بيت يقول : الله اكبر علي
الظالم المفتري الغدار اصحك تسيبو او تسامحو

وخامس بيت يقول : جساس
خمني وغدربي وطالع على الجرح بظهري وتعرف ...

وسادس بيت يقول: الزير
اخويا اعرفو قوي وشديد يمرمط العدوين ويشلفطهم شلفطه...

وسابع بيت يقول: يا سلومي يا ابو السلالم خليك راجل وبطلك حركات البزورة
والبيت الثامن يقول فيه: شوف ياسالم لا تخلي ولا احد منهم لاراجل ولا شيخ ولا
عجوزة ولا حريم واقتلهم كل واحد ومرتو حتى البزورة لاتسيبهم المهم فقّع
ابوهم كلهم.

وتاسع بيت يقول فيه: لا تصالح اي واحد منهم وربي لو تصالح
احد حأشتكيك لربي

وعاشر بيت يقول فيه: لو ما سمعت كلامي دا ولا سويت الي وصيتك عليه نتقابل عند قاضي
القضاة رب السموات والارض .. المهم بعد الهرجة هذي صاحبنا البدوي راعي
الغنمات كمل علي عمنا كليب حسب طلبو .. المهم الهرجة دحين وصلت لحارة
كليب واهلوا عرفوا بالهرجة كلها وطبعا اخوانوا سووا فيها كيف وما كيف
ومن الكلام دا... ونحن نفعل ونحنا نسوي وحقنا مايروح لو علي شواربنا
ومن الخراط هادا.

المهم راحوا عند بيت عيال عمهم وتقابلوا مع ابوهم
يعني قلك يسون مفاوضات... وهادا بدال هادا وما ادري ايش المهم مااتفقوا
وقالوا خلينا نشوف الدب الداشر سالم ايش يقول؟.

وبعدين صاحبنا سالم كان
سكران مع ولد عمو همام (ابو رحم) يعني رحيمو ... تعرفون كانو داشرين
حقين شراب وبنات وكباين وشاليهات ومخلينها خل وطرشي .. المهم ارسلو
واحد يقول لهم الهرجة وجا الراجل الي بيقولهم الهرجة ، وكان الدب
الداشر(الزير) سكران مقربع مزبوط ومأجر السقف العلوي بالملحق كمان ...
وطل همام وعرف الهرجة,

وفجأه طلع لهم الدب الداشر وقال:ايشبكم ياهووه
ايش الهرجة قاعدين تتوشوشو علي ايش؟
... احس انو في شي بس ما تبغو تتكلمو ...بنت يا ضباع ايش الهرجة؟ المهم
العالم خافت وقامت تنفض من الخوف... سحبو همام وقالو ادخل جو ونتفاهم
... مسكو من صدرو قلّو ياهو ايش الهرجة قلبت راسي وفكفكتها معايه وانت
عارف انو مرووقين وشاربين . قلّّو همام شوف: لو قتلوا اخوك كليب... ايش
تسوي؟

قام ضحك الدب الداشر(الزير) الا شوي كشر بوجهو وقلب قارورة العرق
وخلها تقطر شويه شويه... قلّو شايف هدا العرق كيف يقطر؟

طالع همام
مستغرب قلّو لا تستغرب ياواد ... لو قتلوا اخويه انا اخلي دم اخوي وكل
قطره من دمو براس رجال من قبيلتهم ... وانتا شوف اخوي قد ايش عندو دم
بكاش الواد هادا الزير
.. المهم .. همام قال : ياهوووووه ما بدها خليني
اديلو الهرجة والي يصير يصير .. وقلّو الهرجة ..

والدب الداشر الزير
سوا مناحة ديك الليلة .. وهاتك يابكى وصراخ زي البزوره .. تعرف مع
السكار والخبر الي مزفت .. نكب الدنيا ...المهم قاعد يقول اشعار وتهديد
وتخاريف ومدري ايش من الكلام دا حق السكرانين .. لمن طلع الصبح وصاحبنا
نايم علي الدكة وحالتو حاله
... ولد اختو من جد ؟ قال لابوه : هيا نقتلو وهو سكران وفكنا من شرو
ابوه طرطع قلّو ايشبك انتا مجنون ؟ ياواد عيب دا خالك ... وسدحو
بكلمتين وروق الواد ..

المهم صبح الصبح وكل واحد يبغى يسري عند اهلو
عشان يشوفون ايش الهرجة وكيف راح يدور البوكس بينهم.. يعني المعركة
وقبل مايمشون ... سوا فلم هندي الدب الداشر وقريبو همام ... قلك ماراح
اقتلك وما ادري ايش وما ابغاك تكون خصمي يا همام ...

وقلك همام يقول لا
ياهووووه كيف دولا أهلي وبرضو ما اعتقد اني بسكت ...

ومن الخرابيط هادي
.. المهم كل واحد سرى عند اهلو ... وقالوا بيننا البراحة ونشوف مين يغلب
.. وباقي القصة يااولادي .. راح احكيكم هيه .. لما تنجحوا وتجيبوا
الشهادة ..

واقلكم ايش سوا ابو ليلى فيهم ...
رد مع اقتباس
  #2  
قديم 29-03-2007, 06:47 AM
sami haroon sami haroon غير متواجد حالياً
عضو خطير جدا
 
تاريخ التسجيل: Apr 2005
الدولة: السعودية - جدة
المشاركات: 16,324
افتراضي

حلووووووووووووووووة الكلام الجداوي

يسلمووووووووو ياعسل
__________________





رد مع اقتباس
  #3  
قديم 29-03-2007, 09:24 AM
JuSt a GiRl JuSt a GiRl غير متواجد حالياً
عضو الماسي
 
تاريخ التسجيل: Feb 2007
الدولة: في بيتنا
المشاركات: 1,534
افتراضي

ههههههههههههههههه
حلوووه

بس انا عايزه الباقي اجيبلك الشهاده وتديها لعموو ويكمللي القصه

مشكووره
رد مع اقتباس
  #4  
قديم 29-03-2007, 02:24 PM
بنت المدينة بنت المدينة غير متواجد حالياً
مشرفة عامة
 
تاريخ التسجيل: Feb 2007
الدولة: المدينة المنورة
المشاركات: 11,062
افتراضي

شكرا سامي
رد مع اقتباس
  #5  
قديم 29-03-2007, 02:24 PM
بنت المدينة بنت المدينة غير متواجد حالياً
مشرفة عامة
 
تاريخ التسجيل: Feb 2007
الدولة: المدينة المنورة
المشاركات: 11,062
افتراضي

الباقي السنة الجاية

رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML متاحة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
موضوع شامل لكل ما يخص المرأة الحامل همسة الأزياء و الموضة 0 14-09-2013 12:36 PM
ملف شامل عن تغذية الأطفال أميرة القلوب كل ما يخص الأطفال 6 30-06-2008 10:51 AM
ملف شامل عن ( الدوخــــــــــــــــــــه ) أنواعها وعلاجها DoDa AlBtOoOtA الطب والصحة 0 22-02-2008 01:42 AM
ابني سالم ( قصة مؤثرة ) sami haroon القصص والأدبيات 3 20-04-2007 08:52 AM
الى محبي الخيول موضوع شامل ؟ M A N ركن الذهبية العام 2 24-01-2007 10:13 PM


الساعة الآن 01:22 PM.


Powered by vBulletin® Version 3.8.6
Copyright ©2000 - 2024, Jelsoft Enterprises Ltd