دورة : كيف تكسبيين محبوبك**للمتزوجين والمقبلات على الزواج

[أميرة القلوب]

بسم الله الرحمن الرحيم


دورة : كيف تكسبين محبوبك *** للمتزوجات و المقبلات على الزواج ***


http://www.asmilies.com/smiliespic/FAWASEL/008.GIF



توجهيها :


لكل متزوجة / لكل مقبلة على الزواج / لكل فتاة أرادت الإستفادة ..



هدفها :

كسب الزوج الحبيب بطرق عملية سهلة و بسيطة ..



أدواتها :


ورقة و قلم / متابعة / إرادة و تنفيذ






|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|





خلونا نبدأ دورتنا بـ الحب




إحنا كحريم و كبنات و كأناث عموماً الحب هو الغالب علينا و متملكنا .. حبنا للأهل للوطن للأحبة ..
بس وايد من المتزوجات يجهلون حبهم لأزواجهم .. فعشان نكون على بينة كلنا .. راح نعرّف (( الحب ))


الحب عندنا نوعين :



1- حب مطلق
يعني تحبين بدون حدود و بدون شروط و بدون قيود .. مطلق عام ..



2- حب مشروط
يعني كأنك تقولين لزوجك ( راح أحبك بس / إذا اشتر أو اشتريت لي حاجة معينة أنا أبغيها ... ) ..
*
*



لو جينا للنوع الأول : الحب المطلق :

هذا هو الحب المطلوب منك كزوجة .. تحبين زوجك حب مطلق .. و لا تخلين أي عائق يواجهك في الحياة يمس شي بسيط من ذاك الحب ..
يعني اتفقتي معاه على إنه يجيب لك شغلة مهمة .. و لما رجع للبيت قال لك : اوووو نسيت ..
مثل هالموقف لا تخلينه يأثر في حبك أو يخليكي تكرهينه .. أنتي يمكن تكرهين التصرف نفسه
لكن ما تكرهين زوجك .. و في فرق أكيد .. لأن في قاعدة تقول :: فرّق بين الفعل و الفاعل :: إحنا نكره أفعال أو تصرفات معينة اصدرت من قبل أشخاص لكن ما نكره الاشخاص أنفسهم ..
أكيد من خلال جلساتكم .. صادف و سمعتوا فلانة تقول : ( بديت أكره زوجي لأنه مهمل بيته ) و المفروض إنها تكره إهماله مش تكرهه هو ..
عموماً :: ابي كل وحدة فيكم تقول و تردد بينها و بين نفسها
( أنا أحب زوجي لذاته .. و ما راح أخلي أي تصرف طارئ يهز شي من حبي له )
الطيبون للطيبات .. و الخبيثون للخبيثات ..
سمعناها كثير .. هي قاعدة قرآنية يماثلها مثل دايماً نردده ( الطيور على أشكالها تقع ) تعرفونه أكيد .. و في قاعدة روحانية تأكدها ( الأرواح المتشابهة تلتقي ) ..
لو جينا لحياتنا .. و أعطيكم على نفسي مثل :: أنا وسط أهلي و أستحقهم و يستحقوني .. ليش ؟ لأن إحنا أكفاء و متشابهين كثير ..
إرتبطت بزوجي .. لأنه هو اللي يناسبني .. بس من أي ناحية ؟؟ ناحية أرواحنا تتشابه ..
أنتي و زوجك .. ارتبطتوا ببعض .. ليش ؟ لأن أرواحكم متشابهة .. أنتي تستحقين هالزوج .. و هو يستحقك ..
مستواكي و مستواه متشابهين من أي ناحية ؟ ناحيةالمستوى الروحاني نفسه عشان كذا صار بينكم تجاذب
هذا التشابه يلغي الفوارق .. إحنا دايماً نركز على إن الشخص هذا وسيم و غني ... الخ يعني لازم ياخذ وحدة من مستواه المادي !! و نتفاجأ إنه أخذ وحدة مستواها المادي أقل منه ..
و سمعنا كثير ( أنا جميلة و جامعية و من عايلة لها مركزها ) و نشوف إنها تزوجت من شاب عنده ثانوية عادي بحياته الإجتماعية ..
دايماً ننهي إستغرابنا بإنه (( نصيب )) هو نصيب و الله كاتبه فعلاً .. لكننا غفلنا عن مسألة تشابه الأرواح .. يعني من اليوم و رايح لو شفتوا حالات مشابهة قولوا (( هذا نصيب و تشابه أرواح و الله سبحانه و فق بينهم )) ..
و في بنات تزوجوا من ناس أكبر منهم أو أغنى أو أكثر وجاهة ... الخ لكن مستوى الزوج هذا هو نفسه مستواها .. و حريم تطلقوا من أزواجهم و تزوجوا غيرهم .. و هكذا ..
طيب و الحل ؟

هم حلين :
1- تتكيفين مع الوضع الحالي .. و تحسنين من طرق التعامل .. و تمشين معانا لآخر الموضوع ..
2- إنكم تنضجون مع بعض عشان تحققون سعادة أكثر و فهم أعمق ..
إذا و لا حل اعجبك .. اطلبي الطلاق .. هاا اشقلتي ؟


قرري من الحين :
تبين تستمرين ؟ إذا جاوبتي بـ لا .. لا تنتظرين و اطلبي الطلاق .. بس تأكدي إن هذا نصيبج و هذا مستواج و ما راح تلقين أفضل منه من ناحية الروحانية ..
إلا إذا قررتي إنج تنضجين .. و أنا أنصحج إنج تنضجين معاه و في نفس الوقت ..
و إذا جاوبتي بـ نعم .. اشتغلي على نفسج من الحين و اسعي عشان تحسنين و تعدلين من علاقتكم ..




الواجب الأول :


اخذي ورقة .. و كتبي عليها من فوق ( ورقة المفاهيم ) .. و بعدها اكتبي الجملة الجاية :
سأطبق جميع الواجبات و التمارين


هاذي حلقتنا الأولى من الدورة .. أتمنى إني قدرت أوصل لكم اللي أبغي أوصله ..

بس يا ليت من كل وحدة ترد .. تعطيني رايها : أستمر أو لا ؟ و بتكون متابعة معانا أو لا ؟
*
*
*



الحلقة الجاية : 3 شروط للسعادة الزوجية ان شاء الله

منقوووول

أختكم المحبة أميرة القلوب

[أميرة القلوب]

بسم الله الرحمن الرحيم



دورة : كيف تكسبين محبوبك ||,",|| للمتزوجات و المقبلات على الزواج ||,",|



نكمل اللي بدينا فيه .. و في هالحلقة راح أعرض لكم 3 شروط تحقق السعادة الزوجية .. مع الإنتباه

إلى إن هالجزء راح يكون عملي أكثر .. و حيوي أكثر .. يعني فيه صور و جداول و أكيد واجبات

أتمنى إن كلنا و أنا أولكم نلتزم بها .. اتفقنا ؟

نبدأ على بركة الله ..


http://www.asmilies.com/smiliespic/FAWASEL/008.GIF







الشرط الأول :: السعادة تبدا من الداخل ::

اشلون تبدا من الداخل ؟

يعني لا تظنين إن لما يكون عندج فلوس و صرتي غنية يعني لازم تكونين سعيدة

أو لما تكونين صاحبة أعلى الشهادات إذا لازم تكونين سعيدة

أو لما تكونين صاحبة مركز مرموق يعني لابد تكونين سعيدة

أو لما تكونين آية في الجمال يعني أنتي سعيدة

المال و الوجاهة و المناصب و الجمال ما هي إلا وسائل تعين بس ما تصنع السعادة أنتوا معاي ؟؟

بإختصار إذا ما كنتي سعيدة من من الداخل ما راح تحصلين هالسعادة في الخارج ..

خليني أهمس في أذنج أختي العزيزة و أقول لج ( إذا ما كنتي سعيدة من الداخل ما راح تقدرين تسعدين زوجج و لا اعيالج و لا أي أحد من اللي حولج .. لأن فاقد الشي لا يعطيه ) ..

عشان جذي أقول لج خلي البداية منج و في نفسج .. تعلمي اشلون تكونين سعيدة حتى لو كنتي وحيدة ..

حريم وايد هم في الأصل مش سعيدين .. فلما تصير لهم مشكلة مع أزواجهم أول شي يسوونه يلقون اللوم على أزواجهم و إنهم السبب في عدم سعادتهم أو تعاستهم ..

*
*

عشان نتعلم أشلون نكون سعداء عشان نسعد .. أو تتعلمين اشلون تُسعدين عشان تِسعدين .. تابعوا معاي الفقرة الجاية ..



في نظرية ملخصها ( إيفاء حقوق 4 جوانب في الحياة ) .. و الجوانب هي :

الجانب الروحاني
الجانب الإجتماعي
الجانب العقلي
الجانب النفسي

خلنا نفسر النظرية و بإختصار شديد ..

تفسيرها : إن اللي بيعطي كل جانب من الجوانب اللي ذكرتها حقه بيكون سعيد بإذن الله ..

طيب الحين راح نوضح كل جانب و بشكل سريع :

الجانب الروحاني :: هو جانب معانيه عميقة جداً .. متصلة بالروح .. مثل الإيمان و التوكل و الإنتماء و القيم الإجتماعية ..

الجانب العقلي :: متعلق بالجانب الثقافي و العلمي و النفسي ..

الجانب الجسدي :: متعلق بالجانب الفسيولوجي البدني الجسماني ..

الجانب الإجتماعي :: هو المتعلق أكيد بالأسرة و العائلة و المجتمع ..

تذكرنا هالجوانب و إيفاء حقها بقول الرسول عليه الصلاة و السلام : || إن لربك عليك حقاً , و إن لأهلك عليك حقاً , فأعط كل ذي حق حقه || , و في رواية || و إن لجسمك عليك حقاً || ..

عشان تحققين و توفين كل جانب حقه .. وشو المطلوب منك كزوجة أو كأم ..

المطلوب : تقسيم الأعمال اليومية على الجوانب الأربع .. ساعة لربك و لعبادتك / ساعة للرياضة و النوم / ساعة للتعلم و القراءة / ساعة للأهل و الأولاد و العايلة .. لا تنشغلين بشي على حساب شي .. و بإذن الله بتكونين من السعداء ..

** ملاحظة : ما أقصد ساعة بمعنى ساعة و إنما وقت كاف لإيفاء جانب حقه لكن بشرط ما يطغى على وقت جانب آخر ..

*
*
*

بكذا .. نكون خلصنا الشرط الأول لتحقيق السعادة الزوجية ..





http://www.asmilies.com/smiliespic/FAWASEL/008.GIF







نكمل شروط السعادة الزوجية .. ذكرنا الحلقة اللي فاتت شرط و هو :: السعادة تبدا من الداخل :: و عرفنا اشلون نُسعد عشان نسعِد ..


الشرط الثاني :: أنتي المسؤولة عن إسعاد نفسك ::

خلونا نتفق من هني على إنك أنتي المسؤولة عن سعادتك محد غيرك ..

لا تعيشين في دائرة الإسقاطات اللي يعشيها الشخص الغير السعيد .. ( مب أنا المشكلة .. المشكلة إن زوجي .. أهلي .. المدير .. السحر .. الشيطان ... الخ هالإسقاطات ..

السعداء هم الذين تحملوا مسؤولية إسعاد أنفسهم

تذكري أختي الغالية .. إنك لما تبغين سلعة غالية .. أو شغلة باهظة الثمن .. راح تسعين بكل ما اوتيتي من قوة عشان تحصلينها و بالتالي تقدرين تتصرفين فيها ..

خلي سلعتك الغالية ( السعادة ) اللي تحتاج إلى جهد و تضحيات و صبر عشان نحققها ..و تحملي مسؤولية السعادة بنفسك و لا تلقين الحمل على الزوج و يصير هو المسؤول عن كل شي حتى سعادتك !!

قاعدتنا الأولى كانت :: السعادة من الداخل :: <<< خلك متذكرتها على طوول ..



http://www.asmilies.com/smiliespic/FAWASEL/008.GIF






الشرط الثالث :: عشان نغير في الغير .. لازم أبدأ التغيير من نفسي أول ::

خلوني أذكر لكم قصة قصيرة تتعلق بهالشرط ..

في رجل نوى إنه يغير العالم .. و قعد على هالحال 20 سنة .. لكن و لاشي تغيّر ..

قرر يغير دولته .. حاول و حاول 10 سنين .. لكن و لاشي تغير في دولته ..

فقال : خلني اغير في مدينتي .. و فعلاً بدا محاولات التغيير لمدة 5 سنوات .. لكن و لا شي تغير !!

قال خلاص عيل باغير في الحي اللي أنا أسكنه .. عل و عسى يتغير شي .. حاول و حاول و حاول

لكن ما تغير شي ..

انتقل بعدها يبي يغير في بيته .. و استمر في محاولاته سنين .. لكن و لاشي تغير !!

في الأخير أدرك إنه لازم يغير من نفسه و هذا اللي سواه ..

**

و أنتي عزيزتي .. بتنتظرين 40 سنة عشان تكتشفين هالحقيقة ؟؟؟ حقيقة إنك لازم تغيرين من نفسك ؟؟ أكيد لا .. من منا يضمن عمره ؟!!

عشان جذي أبي كل وحدة تقول :: أنا ما أقدر أغير زوجي أو أولادي أو أهلي أو صديقاتي ,,, لكني قادرة أغير في نفسي.. يمكن لو غيرت من نفسي .. يتغيرون هم تجاهي ::





http://www.asmilies.com/smiliespic/FAWASEL/008.GIF





الملخص


1- الحب مهارة مكتسبة .. يحتاج إلى مجهود و هو أهم ما تحتاجين ..

2- فرقي بين الفعل و الفاعل ..

3- زوجي هو نصيبي .. و هذا ما أستحقه ..

4- السعادة تبدا من الداخل ..

5- أنتِ المسؤولة عن إسعاد نفسك ..

6- تغيير الأخرين يبدأ من أنفسنا ..



سؤال صغيرون ::

لو كان زوجك جاف في تعامله معاكِ .. وشو المفروض تسوينه كزوجة محبة ؟



الحلقة الجاية : راح نبدا في :: كيف تتغيرين ذاتياً و تغيرين واقعك إلى الأفضل ::

تابعونا بارك الله فيكن

[أميرة القلوب]

بسم الله الرحمن الرحيم




|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|




http://www.asmilies.com/smiliespic/FAWASEL/008.GIF











كيف تتغيرين ذاتياً .. و تغيرين واقعك للأفضل



الجزء هذا راح يكون عبارة عن تمرين حلو و بسيط ..

هو تمرين فكري له مفعوله العجيب .. و من فوايده :

1- يخرج الشحنات السلبية من العقل الباطن .

2- يثبّت الأفكار الإيجابية .

3- يجلب القدر المطلوب لك .

4- يزيد الثقة في النفس .

5- ينبه إلى أمور معينة و غيرها مكبوتة ..

*
*

اشلون بنسوي هالتمرين ؟!

الطريقة جداً سهلة مثل ما ذكرت لكن تتطلب الصدق .. و تفضلوا :

1- اكتبي (( أنا أحب ..... " اسم زوجك " و هو يحبني )) و تلفظيها .

2- اكتبي أول ردة فعل في بالك بعد ما تلفظينها ,, أي ردة فعل .. سواء كانت إيجابية : " أنا فعلاً جذي " .. أو سلبية : " لالا يحبني و لا شي " .. أو محايدة : " يا ليت " .. أو ما لها علاقة : " كأني ما اتصلت في أمي اليوم ؟؟ " .. يعني أول رد فعل في عقلك ..

3- كرري الفعل 5 مرات .. يعني اكتبي نفس الجملة الأولى و بعدها كتبي ردة الفعل الأول .. لحد ما تكملين الـ 5 مرات .. لكن لا تحللين حاجة ..

4- كتبي الحين (( ..... " اسمك " تحب ..... " اسم زوجك " و هو يحبها )) و تلفظيها .

5- اكتبي أول رد فعل على طووول ..

6- كرري 5 مرات ..

7- اكتبي (( أنتِ " الخطاب موجه لك " تحبين .... " اسمه " وهو يحبك )) و تلفظيها ..

8- اكتبي أول ردة فعل ..

9- كرري 5 مرات بعد ..

** التمرين هذا تسوينه لما تكونين بروحك .. في خلوة و بدون أي مقاطعات ( لا تلفزيون .. لا تلفون .. لا شرب شاي ... الخ ) يعني تقعدين تسترخين على الآخر تفضين نفسك من أي عمل .. و تبدين في التمرين ..

و إذا صار و جا واحد من الأطفال يبغي حاجة .. أو زوجك وصل و قاطعك .. يعني حدث شي قطع التمرين عيديه من الأول ..

اتفقنا ؟

** الشي الثاني .. التمرين لازم تسوينه لمدة 14 يوم متواصلين .. إذا نسيتي يوم تبدين من جديد ..
يعني لو بديتي التمرين لمدة 10 ايام و نسيتي يوم واحد .. تعيدين التمرين من جديد ..

في اليوم إذا صار إنقطاع .. تعيدين التمرين نفسه .. يعني في اليوم الأول كتبتي و كررتي بدون أي إنقطاع .. جيتي اليوم الثاني .. و بديتي في التمرين لكن رن التلفون فجأة وقطع عليك .. عيدي الخطوات من رقم 1 ..

واااضح ؟

** لا تحللين ردود الأفعال .. اكتبيها بس .. و عقب حلليها لما تخلصين الـ14 يوم ..

** إذا حسيتي إن المعلومات سرية تقدرين تتخلصين من ورقة التمرين في نفس اليوم أو لما تخلصين الـمدة 14 يوم ..

** إحتمال تاخذ الجلسة الوحدة من 10- 15 دقيقة .. كثير ؟ أكيد لا ..


*
*
*

مثال للتمرين .. للتوضيح أكثر :

الزوجة اسمها عايشة //// الزوج اسمه محمد ( اللون الأزرق = ردة الفعل ) :

1- انا احب محمد و محمد يحبني = بس إنه يتصرف و كأنه ما يحبني

2- انا أحب محمد و محمد يحبني = كان يحبني في بداية زواجنا .

3- أنا أحب محمد و محمد يحبني = أتمنى لو تتحسن علاقتنا ..

4- أنا أحب محمد و محمد يحبني = اووو شهالتمرين ؟

.
.

عايشة تحب محمد و محمد يحب عايشة = يا ليت ..

عايشة تحب محمد و محمد يحب عايشة = يا رب ساعدنا هههه

.
.

أنتِ تحبين محمد و محمد يحبك = كلام فاضي !

.
.

و هكذا .. أتمنى وضح لكم التمرين ..

*
*
*

هاذي حلقتنا لليوم .. أتمنى أشوف تفاعل أكثر مع الموضوع .. لا تصيرون متلقين بس .. شاركوني

بأمثلة .. بواقع .. بأي شي

*
*
*

الحلقة الجاية : كيف تكسبين زوجكِ ؟ " طرق عملية "

ان شاء الله

أختكم : أميرة القلوب

[أميرة القلوب]

بسم الله الرحمن الرحيم





|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|



http://www.asmilies.com/smiliespic/FAWASEL/008.GIF









نستكمل دورتنا .. و نبدأ الجزء الجديد بطرق عملية لكسب الحبيب ( الزوج ) .. مستعدين ؟



أول الطرق :: حبي زوجك حب مطلق ::

تذكرون لما تكلمنا في بداية الموضوع عن الحب .. و ذكرنا أنواعه .. و منها :: الحب المطلق ::
جا الدور عشان نطبق هالحب المطلق .. اشلون ؟

يعني حبي لزوجي لازم و ركزوا على كلمة لازم .. يكون حب مطلق بدون قيود و لا شروط ..

حبي زوجك مهما صدر منه .. يمكن تزعلين / تعصبين / تنقدين / تحزنين ,, معه و عليه بس و لا شي

يأثر على حبك له .. و لازم تأكدين له هالشي ..

مثال على ذلك ::

زوج وقف امام المنظرة ( المرايا ) .. و قال لزوجته : تخيلي لو أصلع ؟؟

ممكن تجاوبه زوجته ( اسم الله عليك توك صغير ) أو ( خل عنك الوسواس و إذا صلعت يحلها الف

حلال و ياكثر عمليات زرع الشعر الرخيصة و الفعالة ) و الأسوأ من هذا كله إنها تجاوبه ( لا ,,

لا تقول .. ما أقدر أتخيلك مصلع ) .. بس الزوجة الذكية و اللي تحب حب مطلق بتجاوب

( حتى لو صلعت يا حبيبي ما راح يتغير شي .. راح تكون محبوب مثل ما أنت الحين )

**



http://www.asmilies.com/smiliespic/FAWASEL/008.GIF

مثال ثاني ::

في يوم رجع الزوج من الدوام .. و سأل زوجته : اشبيصير لو ماعطوني ترقية ؟ .. زوجته ممكن

تجاوبه ( لازم تاخذ الترقية .. إحنا محتاجين للعلاوة المالية اللي بتطلع من وراها )

و الأسوأ إنها تجاوبه بـ ( شنو ! من بكرة تروح تقابل المسؤول و تطالبه بالترقية )

بس المفروض إن الزوج يسمع ( بوفلان .. و لاعليك يا غالي .. هم الخسرانين .. راتبي و راتبك بيكفونا أو راتبك بيكفينا و بيزيد بإذن الله )

شفتوا الفرق ؟

جذي نبيج تكونين مع زوجج .. و جذي نبي حبج له .. يكون حب مطلق ..

كلنا سمعنا عن زوجات تخلوا عن أزواجهم يوم فلسوا ! أو يوم ينسجن و يتخلى عنه المجتمع !

أو يوم يدمن أو أو .. تأكدوا إن مثل هالزوجات .. ما اعرفوا معنى الحب المطلق و لا مارسوه ..

للمرة المليون أكرر :: حبي زوجك حب مطلق :: حبيه إذا أحسن و كافئيه بالإحسان ..

حبيه إذا أساء و كافئيه بالغفران و المسامحة .. حبيه إذا عطى و كافئيه بالشكر .. حبيه إذا قصر

و كافئيه بالستر ..

و حطوا في بالكم خواتي .. إن اللي تحب زوجها ما تتكلم عنه بالشينة مثل ما نقول في العلن و جدام

الخلق .. و لا تكشف له ستر .. و كلامها كله عنه بالخير ..

إذا الحب المطلق = سر الوجود




http://www.asmilies.com/smiliespic/FAWASEL/008.GIF

الواجب الثالث

(( أخبر زوجي إني أحبه و إني سعيدة و محظوظة لأنه في حياتي )) .

الواجب الرابع

(( أضم زوجي و أحضنه .. و أقول له إني أسعد أمرأة في العالم .. و مادري شكنت باسوي لو ما كان من نصيبي ))



أتمنى إنكم تطبقون الواجبات ...

مثل ما أتمنى إنكم تشاركوني بأي ملاحظة .. أو واجب سويتيه و شنو كانت ردة الفعل ..

هل طبقتي شي إنذكر في الموضوع و ما كنتي تسوينه .. طيب شنو ؟ و شنو كانت ردة الفعل ؟

*
*



http://www.asmilies.com/smiliespic/FAWASEL/008.GIF



الحلقة الجاية :: انتبهي ! زوجك دايماً يختبرك ..



تابعنا اختي بارك الله فيك اختك المحبة

أميرة القلوب

[أميرة القلوب]

بسم الله الرحمن الرحيم




|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|




http://www.asmilies.com/smiliespic/FAWASEL/008.GIF




ثاني طرقنا :: انتبهي الزوج دايماً يختبر ::




من الحاجات اللي لازم تنتبه لها الزوجة .. إن الزوج يختبر حب زوجته له كل يوم تقريباً .. بوعي

و بدون وعي ..

أعطيكم مثال ::

تعطلت سيارة البيت اللي يستخدمها السايق عشان يودي الزوجة و الإعيال .. و اضطر الزوج في

ذاك اليوم إنه يوديهم لبيت أهلها و في الرجعة ترجع مع سواق بيت أهلها .. و هناك قالت أم

الزوجة : يا بنتي لازم تصلحون سيارتكم .. مب عدلة تمون جذي بدون سيارة ..

و لما رجعت الزوجة البيت و اقعدت مع بو العيال قالت له : ( أمي تقول لازم تصلحون السيارة ) ..

ممكن هني الزوج يختبرها عشان يعرف وزن كلمته عند أمها .. فيقول لها ( أنا أشوف إن نأجل

الموضوع شوي على الأقل لين الشهر الجاي أضمن إن السيولة المادية توفرت عندي .. اشرايج ؟ )

الزوجة لما ترد عليه ( بس عاد أمي قالت .. ) ما راح تنجح ..

لأن ردة فعله بتكون يا إما إنه بيعصب من خلال رده : ( يعني كلامي و لا كلام الوالدة ؟ ) .. أو

بيكبت .. و طبعاً ردة الفعل المكبوتة تكون أشد خطورة .. فإنتبهي عزيزتي الزوجة

و تذكري :: طاعة الزوج مقدمة على الوالد/ة و غيرهم شرعاً و عرفاً



http://www.asmilies.com/smiliespic/FAWASEL/008.GIF



الواجب الخامس

( إذا وضع زوجي في المقارنة مع أحد فسوف يكون هو الأول ) ..



عزيزتي .. تعرفين متى نقدر نقول إن إحنا وصلنا بحبنا للحب المطلق ؟؟ إذا تأكدنا أو تأكدتي

يا لزوجة من إن حبج لزوجج هو حبه لذاته بغض النظر عن أي شي ثاني .. لا شهادة / لا مال /

لا وسامة مثلاً .. و عشان تعرفين و تتأكدين من نفسج .. حطي روحج في إختبارات و اسألي

نفسج :: يا ترى هو لو ما كان وسيم .. كنت باحبه ؟

يا ترى لو ما كان غني .. كنت باحبه و بارضى فيه ؟

و صدقيني يا غالية .. إن العشرة و هني أقصد بعد الزواج تبين لج نوع حبج له هل هو مطلق مثل

ما نتمنى


و بالنسبة لشكره على واجب المفروض إنه يسويه و ملزوم به ..

حطي نفسج محله .. قدمتي له هدية بدون مناسبة .. و خذها بدون ما يشكرج أو يجاملج .. شنو

بتكون ردة فعلج ؟ مثل ردة فعله لو ما حسستيه بقيمة الشي اللي يسويه أو سواه حتى لو كان

شي ملزوم فيه ..

مثال من واقعي : مرة عطاني مصروفي ( هو ملزوم بالنفقة علي ) .. بعفوية اشقلت له : ( لا خلا و لا عدم يا بوعبدالله ) .. و كانت ردة فعله : ضمني و قال ( ولو حياتي .. واجب علي ) " اذكروا الله يا جماعة " .. بس ردة فعله الحقيقية كانت غير ^_^

أميرة القلوب

[أميرة القلوب]

بصراحــــــة انا مو متزوجه ولا مقبلــــة على الزواج يعني مرة بدري علينا

بس حبيت افيــــــد أخواتي المتزوجات الموجودات في المنتدى

وياليت استفدوا ويحققوا امنيتي

أختكم : أميرة القلوب

[rorita]

تسلمى اميره عالموضوع رائع

وانا زيك مو متزوجه بس انشالله استفيد من موضوعك..

يعطيك الف عافيه....

[أميرة القلوب]

يسلموووو روريتا على مرورك الرائع

نورتي بمرورك

وانشاء الله تستفيدي والجميع انشاء الله

[الحالم]

والله دوره روعه ياملكة القلوب وتستاهلي عليها باقه


وياريت كل البنات يستفيدوا منها


وجزاك الله كل خير



وتقبلي مني أرق وأطيب الامنيات