ياموتك أنتي يا أنا أموت وأرتاح ،،،مافيه غير الحل.........!!

[باكـي بصمـت]

ياموتك أنتي يا أنا أموت وأرتـاح مافيه غير الحل هذا مـن الآخـر

واللي يعيش بيعرف إن الغـلا راح ولا يعود اللـي أندفـن بالمقابـر

الموت أرحم من حيـاة ٍ بالأتـراح مليت أقول إن الفرج جاي وناطـر

لو للمنايا سيوف أنا عشقي أرماح أوجاع شقّة صدري تنهي وتامـر

ودي بموتي منك وأنتي لي ذبـاح عشان قبل أموت أبوس الخناجـر

تعبت وقلبي على غصن الشقا ناح ماعاد فيني حيـل بالصبـر أكابـر

محروم منك ومن حواليك بأفـراح يسعد صبـاح الجامعـه والدفاتـر

ماغير أنا أتخّيلـك ويطيـح تفـاح عجزت أحل اللغز والغيـم شاطـر

كنت أحسب إني فاهم وماخذ أوشاح قبـل تقولـي ياحلـو روح ذاكـر

والحين جيتك طير ٍ وذيب وسبـاح ومجنون وعاشق كلها وسط شاعر

لاتقولي أصبر والصبر داخلي فـاح وأحرق ثيابي جمر من كبد صابـر

يممت لك وجهي بعـد بارقـك لاح وأطوي لك البيدا بكـف المخاطـر

معبودة الحسن إنخلقتي بمصبـاح والليل أسلم عقـب ماكـان كافـر

منك أنشرح ليل ٍ به آلام وأجـراح ويرتلك مهـووس ٍ أيـام ساهـر

كان العمر عندي على شكل مسباح الخيط روحي والخرز أمس وباكـر

والخيط بيدك صار بس الخرز طاح تكفيـن لمّـي كلـي اللـي تناثـر

مدري وش اللي باقي ٍ فيني ماصاح كل الضلوع الحـدب منـك تزافـر

والله واللي حـط بأجسادنـا أرواح إن كان متيّ لينبش القبـر جابـر

ودي أموت ولا تموتيـن أبرتـاح أخاف لـو متـيّ أحفـر المقابـر